गेल्या वर्षी १० जुलैला मेघदूताचा उज्जैनमधून निरोप घेऊन पुण्याला परतलो होतो. उज्जैनच्या महाकाल मंदिरात संध्याकाळच्या आरतीला आपल्या धीरगंभीर स्वरांनी साथ देणारा मेघदूत उत्तरेकडे मार्गस्थ होताना गम्भिरा नदीच्या सौंदर्यात थोडा वेळ रेंगाळतो.. मेघदूत गम्भिराच्या मिलनाची दृश्ये टिपून आता आमचा मेघदूतासोबतचा पुढील प्रवास सुरु होणार आहे. चंबळच्या खोऱ्यात घोंघावून मेघदूत अरवली पर्वताला धडक देईल.. पुढे क्षत्रियांच्या रक्ताने पावन झालेल्या कुरुक्षेत्रात प्रवेश करून प्राचीन सरस्वतीचे जलप्राशन करेल आणि आमचा निरोप घेईल.. इथून मेघदूत आणि आमचा विरुद्ध दिशांनी प्रवास सुरु होईल. मेघदूत स्वतः जरी यक्षाने सांगितलेल्या मार्गाने हिमालयाकडे मार्गस्थ होणार असला, तरी त्याने दर्शन घडवलेल्या सरस्वतीच्या मार्गावरील खंडीत पात्रांत आम्हाला त्याचे प्रतिबिंब ठिकठिकाणी दिसेल.
आज रात्री ८ ला प्रोजेक्ट मेघदूतच्या तिसऱ्या सिझनची सुरुवात होत आहे. मंदार मोरोणे आणि मयुरेश प्रभुणे (दोघेही पत्रकार).. आम्ही दोघे पुढील १५ दिवस प्राचीन सरस्वती नदीच्या खोऱ्यातून मॉन्सूनचा अभ्यास करणार आहोत. प्रवासातील अपडेटस आणि फोटो नियमित अपलोड करूच..
(५ जुलै २०१३, पुणे)
कोणत्याही टिप्पण्‍या नाहीत:
टिप्पणी पोस्ट करा