उत्तर, मध्य भारतात उष्णतेची लाट, दक्षिण भारतात पूर्वमोसमी सरी आणि अंदमानमधून जोरदार पावसाच्या येणाऱ्या बातम्या.. मॉन्सूनच्या आगमनापूर्वीच्या हवामानाचे हे टिपिकल चित्र ! देशाचा बहुतांश भाग उष्णतेने होरपळत असला, तरी त्यातून मॉन्सूनचे आगमन समोर दिसत असल्यामुळे हे चटकेही दिलासादायक वाटत आहेत. १७ मे ला मॉन्सूनच्या अंदमानातील आगमनाची घोषणा करण्यात आली. तेव्हापासून आठवडाभर तो अंदमानच्या समुद्रातच रेंगाळला आहे. अंदमानच्या पुढे मॉन्सूनचा मुक्काम हललेला नसला, तरी ज्या भागात तो पोचला आहे, तेथील त्याचा जोर ही गोष्ट मात्र यंदा नक्कीच आश्वासक आहे. गेल्या वर्षी अगदी अंदमान पासूनच काहीतरी चुकत असल्याची जाणीव मॉन्सूनच्या धारांनी करून दिली होती. महासेन चक्रीवादळामुळे निर्माण झालेली प्रतिकूल स्थिती आता सुरळीत झाली असून, नैऋत्य मोसमी वाऱ्यांचा प्रवाहही अपेक्षेप्रमाणे निर्माण झाल्याचे हवामानतज्ञ सांगत आहेत. आता फक्त हिंदी महासागरात आणि बंगालच्या उपसागरात अपेक्षित दाब निर्माण निर्माण झाला की, मॉन्सूनचा पुढचा प्रवास सुरु होऊ शकेल.
प्रोजेक्ट मेघदूतचे हे तिसरे वर्ष आणि मॉन्सून डायरीचेही. मॉन्सून सोबतच्या प्रवासात येणारे अनुभव आपल्यासोबत लाईव्ह शेअर करण्यासाठी मॉन्सून डायरी लिहावी असा विचार पहिल्या प्रवासाच्या आधी आला होता. आणि डायरीच्या प्रत्येक पानाला आपल्याकडून मिळालेल्या उस्फुर्त प्रतिसादामुळे डायरी रोजच्या रोज अपडेट करण्याचा उत्साह कायम राहिला. यंदाही मॉन्सून डायरी लिहीत आहे. सध्याची महाराष्ट्रातील दुष्काळी परिस्थिती आणि त्याच्या पार्श्वभूमीवर निसर्गाकडून आणि समाजाकडून होणारे मॉन्सूनचे स्वागत अनुभवण्यासाठी प्रोजेक्ट मेघदूतची टीम खूप आतुर आहे. हा सोहळा मॉन्सून डायरीमधून आपल्याला रोजच्या रोज वाचता येईल, अनुभवता येईल.
प्रोजेक्ट मेघदूतच्या तिसऱ्या सिझनची आज सुरुवात होत आहे. माणदेशातील मॉन्सूनपूर्व दुष्काळी परिस्थिती अभ्यासण्यासाठी पुण्यातून सात जण रवाना होत आहेत. मॉन्सूनच्या आगमनानंतर पुन्हा याच भागाला भेट देऊन मॉन्सूनमुळे झालेले बदलही टिपण्यात येणार आहेत. यावेळी प्रोजेक्ट मेघदूतचा प्रवास विशेष आहे. जागतिक ख्यातीचे फिल्ममेकर स्टूर्ला गुनार्सन यंदा प्रोजेक्ट मेघदूतसोबत मॉन्सूनचा पाठलाग करणार आहेत. मॉन्सून प्रमाणेच त्यांच्यासोबतचे अनुभवही मॉन्सून डायरीतून आपल्या समोर येतील.
कोणत्याही टिप्पण्‍या नाहीत:
टिप्पणी पोस्ट करा